DBH 1. MAILAKOEN BISITA EKAINBERRIRA

Like
Atsegin dut Maite dut Jaja Ooo Triste Haserre

Ostegun gizenean sekulako koreografiak dantzatu eta gero, Ekainberrira egin zuten bisita ostiralean DBH 1. mailako ikasleak. Bertan, paleolito garaiko labar-artea ikusteko aukera izan zuten. Gaur egun, benetako kobazuloaren erreplika bisitatu daiteke, bisitarien presentziarekin margo originalak ez ondatzeko. Ondorioz, fidelki berreraikitako haitzulo hau izan zen ikasleek ikusi zutena.

Gizarteko ikasgaian ikasitakoa jarri zuten praktikan egindako bisitan. Gida baten laguntzarekin, historiaurreko gizakiek haitzuloan egindako margoen esanahia topatzen saiatu ziren. Ehizatzen zuten hori margotzen zuten? Sinesmen kontua zen? Auskalo…

Bestetik, garai hartako gizakien ehiza gertuagotik ezagutu zuten. Historiaurreko armak erabiltzen ikasi eta estrategikoki kokatutako hainbat animalia ehizatzen saiatu ziren. Horretarako, talde bakoitzari lantza bat eman zitzaion eta hura jaurtitzen laguntzeko bultzagailu bat. Batzuk punteria bai baina lantza erabiltzen trebetasun gutxi. Izan ere, ez zen lan makala! Saiatu, saiatu ziren baina azkenean, gehienak begetarianoak egingo zirela ondorioztatu zuten; ehizan izandako arrakasta eskasa ikusita, hobe basafruituak biltzea eta jatea!

Argazki guztiak ikusteko, KLIK HEMEN.

Like
Atsegin dut Maite dut Jaja Ooo Triste Haserre