MINERALOGIA ETA PALEONTOLOGIA ASTEAN BISITARI

Iragan astean, Batxilergo lehenengo mailako ikasleak urriaren 29tik azaroaren 4ra bitartean ospatutako mineralogia eta paleontologia astean izan ziren. Urtero ospatzen den aste honetan, mineralak eta fosilak dira protagonistak eta denboran zehar bidaiatzeko aukera ematen dute. Museoan zehar, panelak, irudiak, testuak, argiak, mezuak… oso erakargarriak dira bisitariari ahalik eta modu atseginenean edukiak transmititzeko.

Gure ikasleak goizean abiatu ziren Urretxura eta museora iritsitakoan, bisita gidatu bat izan zuten, non azalpenak eman zizkieten munduko fosilen inguruan. Ondoren, museora bisita egin zuten eta bertan harrien zazpi propietateak aztertu zituzten taldeka. Probetxuzkoa izan zelakoan gaude, biologia klasean landutakoa bertan praktikan jarri baitzuten. Bukatzeko, azokara joan ziren, salgai zeuden mineral eta fosilak miresteko.